Facebook

Facebook isch e Websyte zum Bilde un Unterhalte vu soziale Netzwärch, wu vu dr Firma Facebook Inc. mit Sitz im kalifornische Palo Alto bedribe wird. Di greschte Aadeilseigner sin 2012 no dr Schwyzer Handelszeitung dr Mark Zuckerberg (28,2 %), Accel Partners (10 %), dr Dustin Moskovitz (7,6 %), Mail.ru Group (5,4 %), dr Eduardo Saverin (4 %), dr Sean Parker (4 %), dr Peter Thiel (2,5 %), d Sheryl Sandberg (1,8 %), Microsoft (1,5 %) un Greylock Partners gsii. Im dritte Quartal 2015 het d Plattform no eigene Aagabe wältwyt 1,5 Milliarde aktivi Nutzer gha. Im alemannische Ruum sin verschidni scherzhafti Wörter für Facebook uffcho. Die Begriff sin meischt Lehnübersetzige vum änglische face ‚Gsicht‘ un book ‚Buech‘. So het's im „Züri-Slängikon“ d Yyträg „s Fratzebuech“ un „s Gsichtsbuech“. In de Basler Zytig isch im Februar 2011 en Artikel zur Sproochsituation im Elsass erschiene, mit em Titel „Sogar auf dem Fràtz Büech lebt das Elsässisch“. Und en pänsionierte Idiotikon-Mitarbeiter het di scherzhaft Ibersetzig „Faxebuech“ uffbroocht.


Developed by მერაბ მგელაძე